النقاب في كندا - كيبيك تحديدا

موضوع طويل اوي عن اللغة و الدين في كيبيك

أحد العضوات الفاضلات سألت سؤال عن النقاب في كيبيك. شكرا لكل الناس اللي ردت بذوق و لكن واضح ان أغلبية المعلقين مش عايشين في كيبيك.

البوست مالوش دعوة برأيي الشخصي, ده سرد للوقائع بحياد و صراحة عشان الناس اللي ناوية تيجي كيبيك.

.

للأسف كثير من الناس بتجادل و هي عمرها ما عاشت في كيبيك و بعضهم مجاش كندا اساسا !

فخدوا الكام نقطة دول و اعتبروهم دليل فهم المجتمع الكيبيكي مش عشان النقاب بس, لكن عشان كل حاجة.

قبل ما ابدأ في شوية مصطلحات نعرفها سوا.

فرانكوفون : شخص لغته الاولى هي الفرنسية

انجلوفلون : شخص لغته الاولى انجليزية

كيبكواه : شخص ينتمي لمقاطعة كيبيك, غالبا فرانكوفون لكن في اقلية انجلوفون

.

بسم الله نبدا :

1- كيبيك يعني كندا

خطأ, كيبيك مش كندا, الكيبيكواه بيعتبروا كيبيك بلد كامل اتحد مع اقاليم صغيرة ثانية عشان يكون الإتحاد الكندي (ايوة هما بيعتبروا مقاطعتهم أعلى من باقي المقاطعات عدا اونتاريو), بيعرّفوا نفسهم انهم Quebecers or French Canadians لكن كندي لوحدها مبتتقالش من حد كيبيكي. هما مؤمنين انهم بلد حتى لو هما ضد انفصال البلد ده عن الاتحاد الكندي.

.

2- ليه يعتبروا كيبيك بلد مختلف غير باقي كندا ؟

لإن الكيبيكواه مختلفين لغويا و دينيا و و تاريخيا عن باقي كندا.

تاريخيا:

· الفرنسيين هما اللي اكتشفوا كيبيك ( مع ان كان فيها سكان اصليين بس عديها دلوقتي! )

· كيبيك نفسها كانت اسمها مستعمرة فرنسا الجديدة و بعدها تم احتلالها من الانجليز و بقت مستعمرة انجليزية.

للسبب ده هتلاقي اكبر نسبة رافضة لتبعية كندا للتاج البريطاني هم من الكيبيكيين, مش حبا في سيادة كندا بقدر ما هو حبا في سيادة كيبيك.

دينيا :

· الغالبية في كيبيك (كانوا و مازالوا) روم كاثوليك, باقي كندا (كانوا) انجليين و بروتستانت.

ده عمل مشاكل تاريخية كثير و احساس عند الكبيكيين انهم بيدافعوا عن الدين و الارض و اللغة.

لغويا:

· في كيبيكواه كثير مبيتكلموش انجليزي خالص

هتقولي ازاي يعني حد كندي و مبيتكلمش انجليزي, مش ممكن.

هقولك انت كده بدأت تجادل ! خد المعلومة من سكات الله يكرمك

· في كيبيكواه عارفة انجليزي و بتستهبل عشان يتكلم معاك فرنساوي بس

· في كيبيكواه فرانكوفون مش بتعتبر الكيبيكواه الانجلوفون وطنيين! (هما كيبيكواه ابا عن جد لكن لغتهم الاولى هي الانجليزية بدلا من الفرنسية)

· نظام التعليم نفسه في كيبيك مبيهتمش باللغة الانجليزية الا متأخر

.

3- ليه في كيبيكواه مبيحبوش الانجليزي ؟

الانجليزي بالتحديد بيشكل تهديد, مش عشان كثير من المهاجرين بيبقوا عايزين يتكلموه و لكن عشان دي لغة الانجليز اللي كانوا بيتضطهدوا المتحدثيين باللغة الفرنسية ( الكيبيكيين و الاكاديين ) و ده لحد وقت قريب بالمناسبة, لحد الستينات كان الكيبيكي ممكن يتشتم لو اتكلم فرنساوي و هو بيشتري حاجة من السوبر ماركت في مونتريال.

هتلاقي كيبيكواه تحكيلك انهم بيكرهوا الانجلوفون, هتلاقي شباب بيرفض يصاحب حد انجلوفون, هتلاقي ناس كبيرة تحكيلك المأسي اللي كانوا بيعانوها لطمس هويتهم من الانجليز و يقولولك انهم حاولوا يعملوا معانا زي ما عملوا مع السكان الاصليين (زي الهنود الحمر و الانويت)

الموضوع ده هتسمعه في كيبيك من الكيبيكواه (فرانكوفون) و في نيوبرونزويك و نوفاسكوشيا من الاكاديين (فرانكوفون)

.

3- الثقافة الكيبيكة أحادية

كنتيجة للاضطهاد في السابق تحول الثقافة الكيبيكية لثقافة احادية,الخوف من اندثار هذه الثقافة كلغة و دين خلاهم يبقوا ضد اي شخص مختلف. فكرة تعدد الثقافات دي حاجة جميلة بس نفهم انها مصطلح كندي مش كيبيكي, في كيبيك ثقافة واحدة هي المرغوبة و هي الثقافة و القيم الكيبيكية, هم لا يريدون تعدد ثقافات, هم يريدونك على ثقافتهم. حضرتك قبل ما تهاجر لكيبيك, بتمضي اقرار على احترام هذه الثقافة و هذه القيم الكيبيكة. كون انك مبحثتش و قريت قبل ما تهاجر فدي مشكلتك !

( الثقافات العربية, التركية احادية ايضا بالمناسبة )

.

4- ما قصة القوانين العنصرية ؟

بعض القوانين الكيبيكة عنصرية و بها تمييز بالنسبة للمفهوم العالمي لمصطلح التمييز لكنها تخدم مصالح اغلبية الكيبيكين المدافعين عن ثقافتهم او بمعنى ادق عن مخاوفهم.

· مثلا, يوجد شرطة للغة ! و هذا شئ غير موجود في اي دولة متقدمة, هذه الشرطة تحارب كل منتج او بزنس او يافطة ليست فرنسية.

· سيتم تطبيق قانون علمانية كيبيك (قانون 21) . و هدفه محاربة الرموز الدينية في القطاع الحكومي (الحجاب, الترابان, الياماكاه, الصليب بحجم نصف الكف), الاغلبية موافقة على هذا القانون لكن يوجد الكثير من المعترضين.

· اقر الحزب الليبرالي الكيبيكي في 2017 قانون يمنع اي شخص يرتدي قناع يخفي هويته ان يحصل على خدمات حكومية ( مواصلات او رعاية صحية) ,كان الهدف من القانون هو منع النقاب تحديدا (قانون 62)

للتوضيح: حزب المحافظين اليميني في مقاطعة ألبرتا اعتبر قانون علمانية كيبيك عنصري.

هذا القانون اقره حزب (التحالف من اجل كيبيك) الذي يعتبر نفسه من احزاب ( الوسط الى اليمين ). فما بالك بأحزاب اليمين المتشدد.

.

5- هل الكيبيكيين ضد انتماءات المهاجرين؟

اه ولأ, هما مش ضد انتماء الاشخاص (مسلم,مسيحي,يهودي .. الخ) , هما ضد اتخاذ هذا الانتماء لشكل ظاهر في المجتمع. قانون 21 تم تصديره انه ضد المحجبات فقط, لكن هو ضد الكل.

بالنسبة للمظهر الديني:

· انزل ميترو نامور و شوف عدد اليهود اللي بيشتغلوا في مصالح حكومية.

· انزل مترو اتواتر و شوف عدد السيخ اللي بيشتغلوا في مصالح حكومية.

المظاهرات اللي حصلت كان فيها يهود و كان فيها سيخ هيفقدوا وظايفهم الحكومية بسبب القانون ( لهم غطاء رأس (التربان و الياماكاه) يعتبر اساسي في بعض الطوائف الدينية)

يعني مش ضد غير الكيبيكواه, هما ضد اللي ليهم مظهر ديني حتى لو كيبيكواه

· زي البنت الكيبيكواه المنقبة اللي اتشهرت في القضية الاخيرة ( مولودة هي و ابو و جدها هنا لكن اختارت تبقى منقبة)

· كثير من اليهود المتدينين المتضررين مولودين في كيبيك (غالبيتهم انجلوفون)

· تم ازالة الصلبان في مجلس مدينة مونتريال و يتم ازالتها من المحاكم حاليا

· تم التصويت بإزالة الصليب الكبير في برلمان كيبيك ( موجود من عام 1936)

.

بالنسبة للغة:

· حضرتك حتى لو مظهرك ملوش خلفية دينية لكن مبتتكلمش فرنساوي فإنت عندك مشكلة و غالبا هتأثر عالشغل.

· لو انت فرنسي الجنسية و بتتكلم فرنساوي بلكنة باريزيان فإنت عندك مشكلة برضه, لكن مش هتأثر عالشغل.

الكيبيكواه مبيحبوش الفرنسيين, و الفرنسيين بيتريقوا على الكيبيكواه, هتشوف الموضوع ده كثير. الكيبيكواه بيتعبروا نفسهم بيتكموا فرنساوي اصلي و بيعتبروا ان الفرنسيين غيروا اللغة الفرنسية و اضافوا لها مصطلحات انجليزي. فبيحسوا ان الفرنسيين بيتنططوا عليهم لما يكلموهم بلهجة باريزيان. زي ما حد يكلمك عربي و نص الكلمات انجليزي.

· لو انت فرانكوفون بلهجة مغربية او افريقية فمفيش مشكلة و مش هتأثر على الشغل, بس هيتريقوا على اللكنة لما يبقوا مع بعض.

الكيبيكواه شعب ساخر بيعشق التريقة على اي حاجة مختلفة

· لو انت مش فرانكوفون لكن بتحاول تتكلم فرنساوي فهيساعدوك و هيحبوك, هيكون عندك مشكلة في الشغل لو الفرنساوي بتاعك مش كفاية للشغل مش اكثر.

· الكيبيكواه (خارج مونتريال) ممكن يوظفوا واحد اسمه فرناندو (اسم اسباني) اكثر من واحد اسمه جيمس (اسم انجليزي) في حالة ان محدش فيهم بيتكلم فرنساوي عشان مش حابين يشغلوا انجلوفون. لكن هيوظفوا جيمس في حالة ان الاثنين بيتكلموا فرنساوي عشان هيكسبوا اكثر من الانجليزي بتاع جيمس.

.

6- هل الكبيكيين ضد الدين ؟

الغالبية ضد وجود الدين (اي دين) كمظهر في الحياة العامة لكن مش ممكن يؤذوا حد متدين. الاقلية ضد وجود الدين تماما و بأي شكل.

· اول حادثة عنصرية شفتها كانت لواحد مسيحي عشان لابس صليب كبير ( الضحية كان مصري قبطي و المعتدي كان كيبيكي )

· شفت مسيرة ضد اي تمثال للسيدة العذارء او للسيد للمسيح, كان فيها شتايم جامدة ليهم (صورتها لكن منشرتهمش عشان وجع الدماغ و انا مش ناقص بصراحة, بس ممكن ابعتها لأي حد عايز يشوفهم)

· في اعتداءات بتحصل على المساجد, رسائل او رأس خنزير بتتبعت من وقت للثاني, المضايقات دي بتحصل للكنس اليهودية و حصلت للعديد من الكنائس ايضا.

· الحادث الارهابي اللي ادى لمقتل 6 مصليين في مسجد كان في مدينة كيبيك, عاصمة اقليم كيبيك.

· في بوسترات لاحزاب كانت بتعرض واحدة بنقاب و من غير نقاب و بتقول للناخبين اختاروا كيبيك اللي انتوا عايزينها, ناس اعتبروا ده انها عنصرية مغلفة بالديموقراطية.

· في الستينات, عملوا ثورة سموها الثورة الهادئة, فصلوا فيها الكنيسة عن اي حاجة ليها علاقة بالدولة, خلوا الراهبات اللي كانوا بيشتغلوا مدرسات و ممرضات يقلعوا الصليب و غطاء الرأس, و فصلوا كل الراهبات اللي رفضت. اتفرجوا على فيلم La passion d’Augustine

عشان كده كان احد الجمل اللي بتتكرر في الدفاع عن وقف عمل المحجبات كمدرسات حكوميات هي جملة ( هل منعنا الراهبات لنشغل المحجبات؟)

.

7- هل يتم معاملة اصحاب المظهر الديني معاملة جيدة ( منقبات, سيخ,يهود) ؟

حد من العضوات الفاضلات (عايشة في النرويج) قالت ان المعاملة كويسة و ذكرت التعامل في المصالح الحكومية و المطارات.

ده برضه بيحصل في كيبيك. التعامل الجيد و الانساني شئ اساسي من موظفين الدولة و من اغلب المواطنين كمان.

· وقت ما منعوا المنقبات من استخدام المواصلات العامة في ستات كيبيكواز غطت وشها و في سواق غطى جزء من وشه كإعتراض على القانون. لكن الناس دي اقلية.

في ناس قبل كده قالتلي ان المهم عندي هو المعاملة الحكومية و مش مهم الناس تفكر في ايه. انا شايف ان ده تفكير سطحي جدا.

اللي الناس بتفكر فيه بيؤدي في النهاية لمطالبات و قوانين هتكون ضد المنقبات. لازم تعرف الناس بتفكر في ايه و رأيهم فيك ايه و مخاوفهم منك ايه بصراحة.

.

.

9- طب بصراحة, بيشوفوا المختلفين عموما و المنقبات خصوصا ازاي ؟

(في ناس هتزعل مني بسبب النقطة دي, انا اسف مقدما لو حد هيتضايق, قولولي لو عايزيني امسحها.. انا مش قصدي اضايق حد )

انا بعتبر اني عندي مهارة ان اخلي اللي قدامي يتكلم بصراحة و دي حاجة فعلا ببقى عايزها, احيانا الكلام بيبقى تابوهات بالنسبة لناس ثانية مينفعش حد يقول رأيه فيها او يناقشها خصوصا لو كانت بخصوص الدين او السياسة.

· الكيبيكواه بيشوفوا المختلفين انهم تهديد لكيبيك و لثقافتهم و لتضحيات عائلاتهم ( في ناس كثير اتقتلت عشان كيبيك تفضل فرنسية )

· الكيبيكواه بيشوفوا المنقبة غريبة الاطوار, زي نساء الاميش او نساء اليهود الارثوذوكس. مش هيهاجموها لكن هيبعدوا عنها و هيعملوا مشكلة لو اتعاملت مع اطفالهم و ده حصل فعلا لمنقبات كانوا بيشتغلوا في حضانة اطفال.

· تأثير الميديا قوي على الكيبيكواه و عشان كده عندهم ايمان ان المنقبة مش حرة, انما هي مغصوبة على امرها و مؤمنين ان غالبا زوجها عنده زوجات ثانية بشكل غير قانوني. كان في تقرير تليفزيوني بيتكلم ان المنقبات محتاجين لمساعدة نفسية لإن عندهم متلازمة ستكهولم. (الشخص المرغم على شئ الذي تحول لمدافع عن هذا الشئ)

- البعض بيسمي المنقبات اسم عنصري (اكياس البطاطس) و بيلبسوها في المظاهرات اللي ضد الرموز الدينية.

- في لقاء تليفزيوني, كان في واحدة من انصار المرأة بتدافع عن المنقبات و اتصلت بيها واحدة قالتلها : ان اللي انتي بتدافعي عنها دي هتكون اول واحدة ضدك لو رحتي عشتي في بلدها و انتي كاشفة شعرك.

الست ردت : احنا في كندا مش في بلدها .

المتصلة قالتلها : لأ احنا في كيبيك مش في كندا ( سمعنا الجملة دي فين قبل كده ؟! )

· الكيبيكواه معندهمش مشكلة كبيرة مع المحجبات ( في مونتريال الكبرى), بس لو المحجبة دي مبتتكلمش فرنساوي او مبتعرفش ترد فممكن تتعرض لمضايقات لفظية من تحت لتحت.

· الكيبيكواه اللي ساكنين بعيد عن مونتريال الكبرى و عن مدينة كيبيك, لطاف جدا, لكن بيخافوا من المحجبات و السيخ.

.

10- هل سيتم منعي من ممارسة معتقدي في كيبيك؟

لأ طبعا, المساجد و الكنايس العربية موجودة و الناس بتروح بشكل طبيعي, و في مدارس دينية كمان في المساجد و الكنايس دي. الكلام ده كله له علاقة بالمظهر ثم اللغة.

و حتى لو المظهر هو جزء من معتقدك فمفيش حد هيمنعك من اردتاء اي زي, سواء كان نقاب, جلباب قصير.. الخ, لكن انتبه انك قد تواجه رفض من المجتمع, حكومة (ظاهر) و شعبا (غير ظاهر) , ده هيأثر عليك و على اولادك.